محمد صلاح المثل الاعلى

مواطن مصري عادي. من قرية. خريج مدارس حكومية. كافح وحفر في الصخر عشان يوصل انه يلعب في المقاولين العرب. كافح وحفر في الصخر عشان يطلع يلعب في سويسرا، نجح نجاح ساحق.

 كافح وحفرمحمد صلاح في الصخر وحارب عنصرية وسفالة في كل بلد لعب فيها ،كافح واثبت نفسه في ايطاليا مع فيورنتينا.

 صمد وعدّى من فشل اولي في انجلترا مع تشيلسي وقام من تاني وعمل نجاح اسطوري في روما في ايطاليا، رجع تاني انجلترا وعمل نجاح غير مسبوق من اول سنة. احدى التريقة والهجوم والتهميش وبرضه العنصرية، والاتهام بانه اكيد one season wonder. والّي عمل سنة، عمله كل سنة، ارقام اعجازية في التهديف وصنع الاهداف.

 حواديت مالهاش مثيل في التعامل الراقي مع كل الناس، الصغيّر قبل الكبير. وفي كل ده مش ماشي انه مصري. اسم مصر معاه في كل نجاح. اعمال الخير بملايين في قريته. نموذج محترم لزوج ملتزم محب، وداعم لمراته، في اجواء تشجع اي مخلوق على الانحراف.

 وقعات كتيرة واصابات واحباطات. لكن مكمِّل من غير استسلام. قائد لمنتخبنا ووصل بينا مع زمايله لكاس العالم. ووصل بينا مع زمايله لنهائي افريقيا واخر ماتش في تصفيات كاس العالم تاني مرة، والفرقة اساسا على قدّها وامكانيات لاعبين ومدرب محدودة. ووصل بفريقه ليفربول لاخر متر في المنافسة في كل البطولات السنة، وكل سنة في الاربع سنين الّي فاتوا،وكل مرة بيقع ويقوم.

 وكل مرة بيضحك من جديد. وكل مرة بيتكلّم بشكل احترافي وراقي وبلغات اجنبية سلسة. محمد صلاح اكبر مليون مرة من كل الصغيّرين الّي شمتانين فيه. ونموذج مصري مسلم ارقى مليون مرة من مدعّين التدين وحملة مباخر الوطنية من ورا الشاشات. محمد صلاح. شكرا. المثل الاعلى.